தப்பியோடிய 17 பேரில் 13 பேர் கைது டிஜிபி தகவல்
3 ட்ரோன்கள் மூலம் தீவிர தேடுதல்!
தமிழக சிறைத் துறை டிஜிபி சந்தீப் ராய் ரத்தோர் கூறுகையில், தேனி மாவட்டச் சிறையில் இருந்து தப்பிய கைதிகளில் ட்ரோன் காட்சிகள் மூலம் பதுங்கியிருந்த கைதிகளை போலீசார் சுற்றி வளைத்தனர்.
மொத்தம் 17 பேர் தப்பியோடிய நிலையில் இதுவரை 13 பேர் கைது செய்யப்பட்டுள்ளனர்.
காவல்துறை, சிறைத்துறையினர் இணைந்து தேடுதல் பணியில் ஈடுபட்டு, இதுவரை 13 பேரைப் பிடித்துள்ளனர். மீதமுள்ளவர்கள் விரைவில் பிடிபடுவார்கள்.
தென் மண்டல ஐஜி விஜயந்திர பிதாரி கூறுகையில்,
அடர்ந்த வனப்பகுதியும் மலைப்பாங்கான நிலப்பரப்பும் கொண்ட சிறைச்சாலையிலிருந்து கைதிகள் தப்பியோடியதைத் தொடர்ந்து, காவல்துறையினர் தீவிர தேடுதல் வேட்டையில் இறங்கினர். அனைத்து வெளியேறும் வழிகளிலும் ஆயுதம் ஏந்திய காவலர்களுடன் சோதனைச் சாவடிகள் அமைக்கப்பட்டு, அண்டை மாவட்ட எல்லைகளும் கண்காணிப்பின் கீழ் கொண்டுவரப்பட்டன.
மேலும், கேரள காவல்துறைக்கு தகவல் தெரிவிக்கப்பட்டதுடன், ரயில் நிலையங்கள், விமான நிலையங்கள், பேருந்து நிலையங்கள், டாக்ஸி மற்றும் ஆட்டோ நிலையங்களிலும் சோதனைகள் தீவிரப்படுத்தப்பட்டன. தப்பியோடிய கைதிகளின் புகைப்படங்கள் பொதுமக்களிடம் பகிரப்பட்டு, கிராம மக்கள், வனத்துறையினர் மற்றும் வருவாய்த்துறை அதிகாரிகளின் உதவியும் கோரப்பட்டது.
தேடுதல் பணிக்காக 17 சிறப்புக் குழுக்கள், 5 STF குழுக்கள் மற்றும் 4 TSP படைப்பிரிவுகள் களமிறக்கப்பட்டன. பொழுது விடிந்ததும் 3 அதிநவீன ட்ரோன்கள் மூலம் வனப்பகுதிகள் கண்காணிக்கப்பட்டன. ட்ரோன் காட்சிகள் மூலம் கைதிகள் இருக்கும் இடங்களைக் கண்டறிந்து, அவர்களைக் கைது செய்வதில் காவல்துறைக்கு பெரும் உதவி கிடைத்தது. சிறையிலிருந்து தப்பியோடிய கைதிகளைப் பிடிப்பதற்காக மேற்கொள்ளப்பட்ட தீவிர தேடுதல் நடவடிக்கைகளுக்கு தேனி மற்றும் திண்டுக்கல் மாவட்டக் காவல் கண்காணிப்பாளர்கள் (SP) தலைமை தாங்கினர் என்றார்.
