கச்சா எண்ணெய் கொள்முதலை நிறுத்துவது தொடர்பாக இந்தியாவிடமிருந்து எந்த அதிகாரப்பூர்வ தகவலும் வரவில்லை என்று ரஷ்யா அறிவித்துள்ளது.
ரஷ்யாவிடமிருந்து கச்சா எண்ணெய் கொள்முதல் செய்வதை உலக நாடுகள் நிறுத்த வேண்டும் என்று அமெரிக்கா அதிபர் டொனால்ட் டிரம்ப் வலியுறுத்தி வருகிறார். குறிப்பாக, ரஷ்யாவிடமிருந்து கச்சா எண்ணெய்யை இந்தியா வாங்கக்கூடாது என்று டிரம்ப் தொடர்ந்து வலியுறுத்தி வந்தார். இந்த நிலையில், இந்தியா - அமெரிக்கா இடையேயான வர்த்தக ஒப்பந்தம் கையெழுத்தான நிலையில், இந்தியாவுக்கான வரியை 18 சதவீதமாக குறைப்பதாக அமெரிக்க அதிபர் டொனால்ட் டிரம்ப் அறிவித்திருந்தார். மேலும் ரஷ்யாவிடமிருந்து கச்சா எண்ணெய் கொள்முதல் செய்வதை நிறுத்துவதாகவும், அமெரிக்கா மற்றும் வெனிசுவேலாவிடம் இருந்து அதிகளவிலான கச்சா எண்ணெய் கொள்முதலுக்கு இந்திய பிரதமர் நரேந்திர மோடி ஒப்புதல் அளித்திருப்பதாகவும் டிரம்ப் அறிவித்திருந்தார்.
அமெரிக்கா அதிபர் டிரம்ப்பின் இந்த அறிவிப்பிற்கு ரஷ்யா பதிலடி கொடுத்துள்ளது. இது தொடர்பாக ரஷ்ய அதிபர் மாளிகை செய்தித் தொடர்பாளர் டிமிட்ரி பெஸ்கோவ் கூறுகையில், ”இந்தியாவுக்கு எண்ணெய் மற்றும் பெட்ரோலியப் பொருள்கள் வழங்குவது ரஷ்யா மட்டுமல்ல என்பது அனைவருக்கும் தெரியும். பிற நாடுகளிடம் இருந்தும் இந்த பொருள்களை இந்தியா கொள்முதல் செய்து வருகின்றது. எனவே, இதில் நாங்கள் புதிதாக எதையும் காணவில்லை.
இந்தியா தான் விரும்பும் எந்த நாட்டிலிருந்தும் கச்சா எண்ணெய் கொள்முதல் செய்ய முழு சுதந்திரம் உள்ளது. எனினும், ரஷ்யாவிடமிருந்து கச்சா எண்ணெய் கொள்முதலை நிறுத்துவது குறித்து இந்தியாவிடமிருந்து அதிகாரப்பூர்வ தகவல் மாஸ்கோவுக்கு வரவில்லை” என்று தெரிவித்தார்.
