அக்ரி & மற்றும் அனைத்து தொழில் வர்த்தக சங்க தலைவர் எஸ். ரத்தினவேல் வெளியிட்டுள்ள அறிக்கையில் கூறியிருப்பதாவது,

அமெரிக்காவுடனான பேச்சுவார்த்தைகள் மூலம் இந்தியப் பொருட்களின் இறக்குமதிக்கு அமெரிக்கா விதித்த வரியை 50% வரியிலிருந்து 18% ஆக குறைக்கச் செய்த பிரதமர் திரு நரேந்திர மோடி அவர்களுக்கு ஆழ்ந்த நன்றியையும் இதயப்பூர்வமான பாராட்டுதல்களையும் தெரிவித்துக் கொள்கிறோம்.

அமெரிக்கா வரியை அபரிமிதமாக உயர்த்தியபொழுது எந்த விமர்சனமோ, எதிர் பிரச்சாரமோ செய்யாமல் அமெரிக்க அதிபர் திரு டொனால்ட் டிரம்ப் அவர்களுடன் நடத்திய சாமர்த்தியமான, அமைதியான பேச்சுவார்த்தைகள் மூலம் அசாதாரண வெற்றியைப் பெற்றுள்ளார்.

இந்த ரகசியமான விவாதங்கள் பின்வரும் அற்புதமான விளைவுகளைத் தந்துள்ளன:

• அமெரிக்காவால் இந்திய இறக்குமதிகளுக்கு விதிக்கப்பட்ட 25% அபராத வரி உடனடியாக ரத்து செய்யப்பட்டுள்ளது.

• பரஸ்பர வரி 25% இலிருந்து 18% ஆக குறைக்கப்படுவதற்கு உறுதிமொழி அளிக்கப்பட்டுள்ளது.

• இதனால் இந்திய பொருட்களுக்கு அமெரிக்காவில் விதிக்கப்படும் மொத்த வரி 50% இலிருந்து 18% ஆக குறைக்கப்பட்டுள்ளது.

இது உலக வர்த்தகத்தில் நெருக்கடியான தருணத்தில் இந்திய ஏற்றுமதியாளர்களுக்கு கிடைத்துள்ள பெரும் வெற்றியாகும்.

விவசாயம் மற்றும் உணவு பதப்படுத்தும் துறைகளுக்கு இந்த வரி குறைப்பு மிகப்பெரிய நன்மையை ஏற்படுத்தும் என்பதை சிறப்பாகக் குறிப்பிட விரும்புகிறோம்:

• பல உயர்மதிப்பு விவசாய மற்றும் பதப்படுத்தப்பட்ட உணவுப் பொருட்களுக்கு இப்போது 0% வரி அமல்படுத்தப்படும்.

• உள்நாட்டு அரிசி, கோதுமை, பால் பொருட்கள், சர்க்கரை போன்றவை அமெரிக்க போட்டியிலிருந்து முழுமையாக பாதுகாக்கப்பட்டுள்ளன.

1. மசாலா பொருட்கள் துறை

• வரி மாற்றம்: 50% → 0% (முழு வரி நீக்கம்).

• இதன் தாக்கம்:

• இந்திய மசாலா பொருட்கள் (மிளகு, மஞ்சள், ஜீரகம், ஏலக்காய், இலவங்கப்பட்டை, மிளகாய், கொத்தமல்லி போன்றவை) அமெரிக்க சந்தையில் விலைப் போட்டியை எளிதில் வெற்றிகரமாக எதுர்கொள்ளும்.

2. மாம்பழம் மற்றும் பிற பழங்கள்

• வரி மாற்றம்: 50% → 0% (மாம்பழம், கொய்யா, பப்பாளி, அன்னாசி, கிவி, அவகேடோ போன்றவை).

• இதன் தாக்கம்:

• புதிய மாம்பழங்கள், மாம்பழ பல்ப், ஜூஸ், உலர்ந்த மாம்பழ துண்டுகள், உறைபனி பொருட்கள் ஆகியவை மிகவும் மலிவாகவும் போட்டித்தன்மையுடனும் இருக்கும்.

3. முந்திரிப்பருப்பு மற்றும் பிற நட்ஸ்

• வரி மாற்றம்: 50% → 0% 

• இதன் தாக்கம்:

• இந்தியா உலகின் மிகப்பெரிய பதப்படுத்தப்பட்ட முந்திரிப் பருப்பு ஏற்றுமதியாளர்; அமெரிக்கா மிகப்பெரிய இறக்குமதியாளர்களில் ஒன்று. நம் ஏற்றுமதி அதிகரிக்கும்.

மேலும், இந்த வரி குறைப்பு இந்தப் பயிர்களை உற்பத்தி செய்யும் விவசாயிகளுக்கு அதிக பண்ணை விலை கிடைக்கச்செய்து பெரும் பலனை அளிக்கும். விவசாய பதப்படுத்தல் துறையில் அதிக வேலைவாய்ப்புகள் உருவாகும்.

 பிரதமரின் இந்த திறமையான இராஜதந்திர நடவடிக்கை, நமது வர்த்தகம், தொழில்துறை, விவசாயிகள் மற்றும் ஏற்றுமதியாளர்கள் அனைவருக்கும் பெரும் நிம்மதியை அளித்துள்ளது.

 இவ்வாறு அக்ரி மற்றும் அனைத்து தொழில் வர்த்தக சங்க தலைவர் ரத்தினவேலு தெரிவித்துள்ளார்.